#ဒီကဗျာပိုင်ရှင်ကိုကျေးဇူးတင်တယ် ။
အခုတော့ မုန်းတိုင်းကစဝင်ခဲ့ပြီ။ အချိန်မီကောင်းပါရဲ့။
ဒီအမေအိုကြီးရှိတုန်း
လာပါသားရဲ့
လာပါသမီးရဲ့
မိုးမှောင်ကြီးကျမလာခင်
အမေတို့အိမ်လေး ဆောက်ကြပါစို့။
သက်ကယ်တပျစ်စီ သယ်ခဲ့ပါကွဲ့
ဝါးတချောင်းစီ ချိုးခဲ့ပါကွဲ့
တယောက်တလက်ဆို အမေတို့တတွေ
အချိန်မှီကောင်းပါရဲ့
မင်းတို့အတွက် အိမ်ကလေးပါကွယ်
မင်းတို့အိမ်မှာ အမေနေရ တခဏပေါ့
ငါ့သားတို့သာ ကျန်နေခဲ့မှာ
ငါ့သမီးတို့သာ ဖြတ်သန်းရမှာ။
မိုးသည်းညတွေ ဖြတ်သန်းခဲ့ပြီးပြီ
ခိုက်ခိုက်တုန်ချမ်း အကာအကွယ်မဲ့တဲ့ ဘဝမျိုး
ငါ့သားသမီးတွေ မကြုံစေချင်ဘူး။
သူများအိမ်တံစက်မြိတ်မှာ
ငါ့သားသမီးတို့ ခိုနေရတာ
အမေ့ရင်ထဲ နာကျင်လှပေါ့။
ကိုယ့်အိုးကိုယ့်အိမ်ထဲ လုံခြုံစေလိုလှတယ်။
အမေတို့အိမ်လေး မြန်မြန်ဆောက်ကြစို့ကွဲ့။
အမေအိုဟာ သူ့သားသမီးတွေကို ဆော်ဩရင်း
ကိုယ်တိုင်လည်း မနားတမ်းလုပ်နေရှာရဲ့။
အရေတွန့်နေတဲ့ သူ့လက်ချောင်းတွေနဲ့
နှီးကိုဖျာတယ် ထရံကိုကာတယ်။
ဝေသီနေတဲ့ မျက်ဝန်းတွေနဲ့ ကောင်းကင်ကို မော့မော့ကြည့်ရင်း
အချိန်မှီကောင်းပါရဲ့ အချိန်မှီကောင်းပါရဲ့လို့
ပူပန်စိတ်နဲ့ တိတ်တိတ်ကလေးရွတ်တယ်။
ပူပန်စိတ်ကို ကြိတ်မှိတ် သားသမီးတွေကို ပြုံးပြုံးလေးကြည့်တယ်။
မဆူရက်မပြောရက်တဲ့ အမေအိုဟာ လေသံလျော့လျော့လေးနဲ့သာ တတွတ်တွတ် တိုက်တွန်းနေရှာတယ်။
လာပါသားရဲ့ လာပါသမီးရဲ့
မိုးမှောင်ကြီးကျမလာခင်
သက်ကယ်တပျစ်ကိုယ်စီ သယ်ခဲ့ပါကွယ်။
ဝါးတချောင်းကိုယ်စီ ချိုးခဲ့ပါကွယ်။
တယောက်တလက်ဆို အမေတို့ အချိန်မှီကောင်းပါရဲ့။
အမိုးအကာလုံခြုံတဲ့အခါ
အမေ့ကိုစိတ်မျက်တဲ့ ငါ့သားလေးလည်း ခိုနားပါကွဲ့။
အမေ့ကိုကျောပေး ဆူအောင့်နေတဲ့သမီးလေးလည်း လုံခြုံမယ်ကွဲ့။
အမေနေရ တခဏပေါ့။
အမေကူနိင်ချိန်လေး မင်းတို့အိမ်လေးပြီးခဲ့ချင်တယ်။
အမေတို့အချိန်မှီကောင်းပါရဲ့။
အမိုးအကာလေး လုံခြုံကောင်းပါရဲ့။
နောက်တကြိမ်...
မိုးမှောင်ကြီးကျမလာခင် ......
No comments:
Post a Comment